தல யாத்திரை - திருநாவுக்கரசு சுவாமிகள் தேவாரம் - நான்காம் திருமுறை

திருநாவுக்கரசு சுவாமிகள் தேவாரம்
நான்காம் திருமுறை
4.66 திருநாகேச்சரம் - திருநேரிசை
கச்சைசேர் அரவர் போலுங் கறையணி மிடற்றர் போலும் பிச்சைகொண் டுண்பர் போலும் பேரரு ளாலர் போலும் இச்சையால் மலர்கள் தூவி இரவொடு பகலுந் தம்மை நச்சுவார்க் கினியர் போலும் நாகஈச் சரவ னாரே.	1
வேடுறு வேட ராகி விசயனோ டெய்தார் போலுங் காடுறு பதியர் போலுங் கடிபுனற் கங்கை நங்கை சேடெறி சடையர் போலுந் தீவினை தீர்க்க வல்ல நாடறி புகழர் போலும் நாகஈச் சரவ னாரே.	2
கற்றுணை வில்ல தாகக் கடியரண் செற்றார் போலும் பொற்றுணைப் பாதர் போலும் புலியத ளுடையார் போலுஞ் சொற்றுணை மாலை கொண்டு தொழுதெழு வார்கட் கெல்லாம் நற்றுணை யாவர் போலும் நாகஈச் சரவ னாரே.	3
கொம்பனாள் பாகர் போலுங் கொடியுடை விடையர் போலுஞ் செம்பொனா ருருவர் போலுந் திகழ்திரு நீற்றர் போலும் எம்பிரான் எம்மை யாளும் இவைனே என்று தம்மை நம்புவார்க் கன்பர் போலும் நாகஈச் சரவ னாரே.	4
கடகரி யுரியர் போலுங் கனல்மழு வாளர் போலும் படவர வரையர் போலும் பாரிடம் பலவுங் கூடிக் குடமுடை முழவம் ஆர்ப்பக் கூளிகள் பாட நாளும் நடநவில் அடிகள் போலும் நாகஈச் சரவ னாரே.	5
பிறையுறு சடையர் போலும் பெண்ணொரு பாகர் போலும் மறையுறு மொழியர் போலும் மால்மறை யவன்ற னோடு முறைமுறை அமரர் கூடி முடிகளால் வண்ங்க நின்ற நறவமர் கழலர் போலும் நாகஈச் சரவ னாரே.	6
வஞ்சகர்க் கரியர் போலும் மருவினோர்க் கெளியர் போலுங் குஞ்சரத் துரியர் போலுங் கூற்றினைக் குமைப்பர் போலும் விஞ்ஞையர் இரிய அன்று வேலைவாய் வந்தெ ழுந்த நஞ்சணி மிடற்றர் போலும் நாகஈச் சரவ னாரே.	7
போகமார் மோடி கொங்கை புணர்தரு புனிதர் போலும் வேகமார் விடையர் போலும் வெண்பொடி யாடு மேனிப் பாகமா லுடையர் போலும் பருப்பத வில்லர் போலும் நாகநா ணுடையர் போலும் நாகஈச் சரவ னாரே.	8
கொக்கரை தாளம் வீணை பாணிசெய் குழகர் போலும் அக்கரை யணிவர் போலும் ஐந்தலை யரவர் போலும் வக்கரை யமர்வர் போலும் மாதரை மையல் செய்யும் நக்கரை யுருவர் போலும் நாகஈச் சரவ னாரே.	9
வின்மையாற் புரங்கள் மூன்றும் வெந்தழல் விரித்தார் போலும் தன்மையால் அமரர் தங்கள் தலைவர்க்குந் தலைவர் போலும் வன்மையான் மலையெ டுத்தான் வலியினைத் தொலைவித் தாங்கே நன்மையால் அளிப்பர் போலும் நாகஈச் சரவ னாரே.	10
திருச்சிற்றம்பலம்

மேலே செல்க

முன்பக்கம்


© 2006 www.templeyatra.com - All Rights Reserved. Designed by www.templeyatra.com