| திருநாவுக்கரசு சுவாமிகள் தேவாரம் |
| நான்காம் திருமுறை |
4.11 நமச்சிவாயப் பதிகம்
பண் - காந்தார பஞ்சமம் |
சொற்றுணை வேதியன் சோதி வானவன்
பொற்றுணைத் திருந்தடி பொருந்தக் கைதொழக்
கற்றுணைப் பூட்டியோர் கடலிற் பாய்ச்சினும்
நற்றுணை யாவது நமச்சி வாயவே.
|
1 |
பூவினுக் கருங்கலம் பொங்கு தாமரை
ஆவினனுக் கருங்கலம் அரனஞ் சாடுதல்
கோவினுக் கருங்கலங் கோட்ட மில்லது
நாவினுக் கருங்கலம் நமச்சி வாயவே.
|
2 |
விண்ணுற அடுக்கிய விறகின் வெவ்வழல்
உண்ணிய புகிலவை யொன்று மில்லையாம்
பண்ணிய வுலகினிற் பயின்ற பாவத்தை
நண்ணிநின் றறுப்பது நமச்சி வாயவே.
|
3 |
இடுக்கண்பட் டிருக்கினும் இரந்து யாரையும்
விடுக்கிற் பிரானென்று வினவுவோ மல்லோம்
அடுக்கற்கீழ்க் கிடக்கினு மருளின் நாம்உற்ற
நடுக்கத்தைக் கெடுப்பது நமச்சி வாயவே.
|
4 |
வெந்தநீ றருங்கலம் விரதிகட்கு எலாம்
அந்தணர்க் கருங்கலம் அருமறை ஆறங்கம்
திங்களுக் கருங்கலந் திகழும் நீள்முடி
நங்களுக் கருங்கலம் நமச்சி வாயவே.
|
5 |
சலமிலன் சங்கரன் சார்ந்தார்க்கு அலால்
நலமிலன் நாடொறும் நல்குவான் நலன்
குலமில ராகிலுங் குலத்திற் கேற்பவோர்
நலமிகக் கொடுப்பது நமச்சி வாயவே.
|
6 |
வீடினார் உலகினில் விழுமிய தொண்டர்கள்
கூடினார் அந்நெறி கூடிச் சென்றலும்
ஓடினே னோடிச்சென் றுரவங் காண்டலும்
நாடினேன் நாடிற்று நமச்சி வாயவே.
|
7 |
இல்லக விளக்கது இருள் கெடுப்பது
சொல்லக விளக்கது சோதி யுள்ளது
பல்லக விளக்கது பலருங் காண்பது
நல்லக விளக்கது நமச்சி வாயவே.
|
8 |
முன்னெறி யாகிய முதல்வன் முக்கணன்
தன்னெறி யேசர ணாதல் திண்ணமே
அந்நெறி யேசென்றங் கடைந்தவர்க்கு எல்லாம்
நன்னெறி யாவது நமச்சி வாயவே.
|
9 |
மாப்பிணை தழுவிய மாதோர் பாகத்தன்
பூப்பிணை திருந்தடி பொருந்தக் கைத்தொழ
நாப்பிணை தழுவிய நமச்சிவாயப் பத்து
யேத்தவல் லார்தமக் கிடுக்க ணில்லையே.
|
10 |
| இது சமணர்கள் கல்லில் கட்டிக் கடலில் வீழ்த்தினபோது ஓதியருளியது. |
| திருச்சிற்றம்பலம் |
